Хүний тархи 50-75 насны хооронд шинэ биологийн үе шатанд ордгийг эрдэмтэд илрүүлжээ

University of California, San Diego-гийн Анагаах ухааны сургуулийн эрдэмтэд хүний тархи 50-75 насны хооронд огт өөр биологийн үе шатанд ордгийг тогтоолоо. Судалгааны үр дүн шинжлэх ухааны Science сэтгүүлд нийтлэгджээ.

Судлаачид ой санамжийг хариуцдаг гиппокампын эсийг нэг бүрчлэн шинжилсэн байна. Энэ насны үед тархины дархлааны эс болох микроглиа огцом цөөрч, оронд нь цусаар дамжин ирсэн дархлааны эсүүд орж ирдэг ажээ. Шинээр орж ирсэн эсүүд илүү хүчтэй үрэвслийн шинж тэмдэг агуулдаг нь тархины архаг үрэвслийг үүсгэж болзошгүй гэж эрдэмтэд үзжээ.

"Ойролцоогоор 50-80 насны хооронд тархины анхны дархлааны эсүүдийн ихэнх нь цуснаас ирсэн эсээр солигддог. Эдгээр эс нь илүү хүчтэй үрэвслийн дохио агуулдаг" гэж судалгааны тэргүүлэх зохиогч, UC San Diego-гийн Эпигеномикийн төвийн эрдэмтэн Nathan Zemke хэлэв.

Мөн нас ахих тусам эсийн генийн гурван хэмжээст бүтэц алдагдаж, эс өөрийн үйл ажиллагаагаа хянах чадвар нь буурдаг болохыг тогтоожээ. Дархлаа, судас, мэдрэлийн систем нэгэн зэрэг, уялдаатайгаар өөрчлөгддөг нь ажиглагдсан байна.

"Энэ судалгаа нь хөгшрөлт бол зүгээр нэг аажим уналт биш, харин дархлаа, судас, мэдрэлийн системийн зохион байгуулалттай өөрчлөлт болохыг харууллаа" гэж судалгааны хамтран зохиогч, UC Irvine-ийн Мэдрэлийн зураглалын төвийн захирал Xiangmin Xu тайлбарлав. Эрдэмтэд энэхүү дархлааны эсийн солигдол нь Альцгеймерын өвчин үүсэх эрсдэлтэй холбоотой байж болзошгүй гэж үзэж байна.