Орос улс шатахууны чанарын стандартаа бууруулж, Евро-2 бензиныг зөвшөөрлөө

Орос улс дотоодын шатахууны хомсдлыг арилгах зорилгоор шатахууны байгаль орчны стандартаа түр хугацаагаар бууруулах шийдвэр гаргалаа. Ерөнхий сайд Михаил Мишустины гарын үсэг зурсан тогтоолыг наймдугаар сарын 5-нд албан ёсны эрх зүйн мэдээллийн портал дээр нийтэлжээ.

Уг шийдвэрээр 2027 оны долдугаар сарын 1 хүртэл Евро-2, Евро-3, Евро-4 стандартын бензин үйлдвэрлэх, импортлох, худалдаалахыг зөвшөөрсөн байна.

Орос улс Евро-2 стандартын шатахууныг бохирдуулагч бодисын агууламж өндөр гэсэн шалтгаанаар 2013 онд хориглосон бөгөөд 2016 онд Евро-5 стандартад бүрэн шилжсэн юм. Евро-2 бензин нь Евро-5-аас 50 дахин их хүхэр агуулахыг зөвшөөрдөг.

Шийдвэрийн шалтгаан нь Украйны цохилтын улмаас Оросын нефть боловсруулах үйлдвэрүүд доголдсонтой холбоотой. Долдугаар сарын эхэн үеийн байдлаар Оросын бензин үйлдвэрлэл дотоодын хэрэглээний 65 хувь хүртэл буурсан бол дизель түлшний үйлдвэрлэл эрэлтийг арай ядан хангах түвшинд хүрчээ.

Оросын Эрчим хүчний яамнаас энэ арга хэмжээ түр зуурынх бөгөөд нийлүүлэлтийг тогтворжуулах, хомсдлоос сэргийлэх зорилготой гэж мэдэгдсэн. Харин байгаль орчны шинжээчид чанар багатай шатахуун шатаах нь утаа, хүчиллэг бороог нэмэгдүүлж, хотын иргэдийн амьсгалын замын өвчлөлийг хүндрүүлэх эрсдэлтэйг анхааруулж байна.