Дональд Трамп, Си Жиньпин нар Иран цөмийн зэвсэгтэй болохгүй, Хормузын хоолой нээлттэй байна гэдэгт санал нэгдлээ

Бээжин дэх дээд хэмжээний уулзалтаар АНУ болон Хятадын ерөнхийлөгчид Иран улс хэзээ ч цөмийн зэвсэгтэй болохгүй, Ормузын хоолой нээлттэй байх ёстой гэдэг дээр санал нэгдсэнийг Цагаан ордон мэдээллээ. Дональд Трамп Си Жиньпинийг 9-р сарын 24-нд АНУ-д айлчлахыг урьжээ.

Ардын Их Хурлын танхимд пүрэв гарагт болсон Дональд Трамп, Си Жиньпин нарын уулзалтаар Иран, Ормузын хоолой, хоёр улсын худалдаа, Ойрх Дорнодын хямрал болон Тайваны асуудал хэлэлцэгджээ.

Цагаан ордны албан тушаалтны хэлснээр "Хоёр тал эрчим хүчний чөлөөт урсгалыг дэмжихийн тулд Ормузын хоолой нээлттэй байх ёстой гэдэг дээр санал нэгдсэн. Ерөнхийлөгч Си мөн хоолойг цэрэгжүүлэх, ашиглалтын төлбөр авах аливаа оролдлогыг Хятад улс эсэргүүцэж байгааг тодорхой илэрхийлсэн" бөгөөд уулзалт ерөнхийдөө "сайн" үр дүнтэй болсон гэв.

Мөн "Хятад улс ирээдүйд хоолойгоос АНУ-аас илүү их газрын тос худалдан авах сонирхолтой байгаагаа илэрхийллээ. Хоёр улс Иран хэзээ ч цөмийн зэвсэгтэй болох ёсгүй гэдэг дээр санал нэгдсэн" хэмээн тэрбээр нэмж тайлбарлав.

Худалдаа, фентанил, хөдөө аж ахуй

Талууд Хятадын зах зээлийг АНУ-ын бизнесүүдэд нээх, АНУ-ын аж үйлдвэрт Хятадын хөрөнгө оруулалт нэмэгдүүлэх зэрэг эдийн засгийн хамтын ажиллагааны арга замуудыг хэлэлцжээ. АНУ-ыг чиглэсэн фентанилын урсгалыг зогсоох хүчин чармайлт нэмэгдүүлэх, Америкийн хөдөө аж ахуйн бүтээгдэхүүний худалдан авалт өсгөхөд ахиц гаргахыг удирдагчид онцолсон.

"Тантай байх нь нэр төрийн хэрэг"

Дональд Трамп Си Жиньпинийг "аугаа удирдагч" хэмээн магтаж, "Тантай хамт байх нь нэр төрийн хэрэг. Таны найз байх нь нэр төрийн хэрэг бөгөөд Хятад, АНУ-ын харилцаа өмнөхөөсөө илүү сайжирна гэдэгт итгэлтэй байна" хэмээн мэдэгджээ. Тэрбээр бэрхшээл тулгарах бүрд хоёр удирдагч "маш хурдан шийдвэрлэдэг" гэж нэмж хэллээ.

Си Жиньпин хариуд нь "Хятад, АНУ хамтын ажиллагаанаас хожиж, зөрчил мөргөлдөөнөөс хохирно. Бид өрсөлдөгчид биш, түншүүд байх ёстой" гэж хэлжээ. Мөн Тайваны асуудлыг АНУ–Хятадын харилцааны "хамгийн чухал асуудал" хэмээн тодорхойлж, зөв зохицуулахгүй бол бүхэл бүтэн харилцааг "маш их аюул эрсдэлд оруулна" хэмээн анхааруулсаныг Шинхуа агентлаг мэдээлжээ.

Есдүгээр сард АНУ-д уулзана

Уулзалтын үеэр Дональд Трамп Си Жиньпин болон тэргүүн хатагтай Пэн Лиюань нарыг 9-р сарын 24-нд АНУ-д айлчлахыг урьсныг зарлав. Зоогийн үеэр Трамп өдрийн яриа хэлэлцээг "эерэг бөгөөд үр бүтээлтэй" болсон гэж дүгнэжээ.

Хоёр ерөнхийлөгч 11-р сард Шэнжэнд болох APEC болон 12-р сард Флоридад болох Их 20-ын чуулганы үеэр дахин уулзах төлөвтэй байна. Дональд Трамп өнөөдөр буюу Баасан гарагт Бээжингээс буцахаас өмнө Си Жиньпинтэй хамт ажил хэргийн үдийн зоог барих юм.