Хантавирус: Америкийн иргэнээс эерэг хариу гарлаа

АНУ-ын Эрүүл мэнд, нийгмийн үйлчилгээний яамны мэдэгдсэнээр MV Hondius аяллын хөлгийн нэг зорчигч хантавирусын халдварт өртсөн нь батлагдлаа. Өөр нэг зорчигч өвчний шинж тэмдэг илэрснийг тус яам мэдээллээ.

АНУ-ын Эрүүл мэнд, нийгмийн үйлчилгээний яам (HHS) Ням гарагт хийсэн мэдэгдэлдээ MV Hondius аялалын хөлгөөс буусан зорчигчдын нэг нь хантавирусын халдварт эерэг хариу үзүүлсэн болохыг баталжээ. АНУ руу буцаж буй нийт 18 хүний бүрэлдэхүүнтэй онгоцонд явж буй өөр нэг зорчигч хөнгөн хэлбэрийн шинж тэмдэг илрүүлсэн боловч PCR шинжилгээний эерэг хариу хараахан гараагүй байна. Хоёр зорчигчид "урьдчилан сэргийлэх үүднээс" онцгой биологийн хамгаалалттай тасалгаа (biocontainment unit)-нд тусгаарлан тээвэрлэгдэж байгааг яамнаас мэдэгдсэн.

Онгоц эхлээд Небраска мужийн Их сургуулийн Анагаах ухааны төв дэх АНУ-ын Үндэсний хорио цээрийн нэгжид буух бөгөөд тэндээс шинж тэмдэг илэрсэн зорчигчийг өөр нэг тусгай халдварт өвчний эмчилгээний төвд шилжүүлнэ. Тус нэгжид "зорчигч бүрд эрүүл мэндийн нарийвчилсан үнэлгээ хийгдэж, нөхцөл байдалд нь тохирсон эмчилгээ үзүүлнэ" гэж HHS-ийн мэдэгдэлд дурдсан байна. Тэнэрифд (Канарын арлууд, Испани) 5-р сарын 10-нд буусан АНУ-ын онгоц 17 америк иргэн ба АНУ-д оршин суудаг нэг Их Британий иргэнтэй хөдлөв.

MV Hondius хөлгийн хантавирусын дэгдэлтэд одоогийн байдлаар нийт 8 баталгаажсан болон сэжигтэй тохиолдол бүртгэгдсэн бөгөөд хоёр хүн нас барсан нь батлагдаж, гурав дахь нас барсан тохиолдол сэжигтэй хэмээн үзэгдэж байна. Дэлхийн эрүүл мэндийн байгууллагын (ДЭМБ) мэдээллээр хантавирус хүнээс хүнд тархах нь нэн ховор бөгөөд Өмнөд Америкийн нэг ангилалд л ийм тархалт ажиглагдсан гэжээ. Эмч мэргэжилтнүүдийн зүгээс уг дэгдэлт "одоо төгсгөлдөө дөхөж байна" хэмээн үзэж буй. АНУ-ын Өвчний хяналт, урьдчилан сэргийлэх төв (CDC)-ын зүгээс буцаж ирж буй америк зорчигчдод заавал хорио цээр тогтоохгүй болохыг өмнө нь баталжээ.

Эх сурвалж: ABC News