Өмнөд Солонгост түүхэн дэх хамгийн дээд хэмд хүрч 42.5 градус хүрчээ

Өмнөд Солонгосын Өмнөд Кёнсан мужийн Янсан хотод ням гарагт агаарын хэм 42.5 хэмд хүрсэн нь тус улсад 1904 онд цаг уурын ажиглалт эхэлснээс хойших 122 жилийн хугацаанд бүртгэгдсэн хамгийн өндөр үзүүлэлт болжээ. Янсан хот лхагва гарагаас хойш дөрөв дэх өдрөө өөрийн дээд амжилтаа эвдээд байгаа юм.

Мөн Пусан хотын хойд хэсэг, Кимхэ, Кёнжү, Гванян зэрэг хотод агаарын хэм 40 хэмээс давжээ. Нийслэл Сөүл хотын бүх дүүрэгт халуунтай өдрийн хоёр дахь өндөр түвшний анхааруулга зарлаж, Засгийн газар гамшгаас хамгаалах штабын бэлэн байдлыг 2-р зэрэгт шилжүүлсэн байна.

Солонгосын Өвчний хяналтын газраас мэдээлснээр 5 дугаар сарын 15-наас 7 дугаар сарын 31-ний хооронд халуунаас үүдэлтэй 1,871 тохиолдол бүртгэгдэж, 13 хүн амиа алджээ. Мөн мэргэжлийн бейсболын хэд хэдэн тоглолт цуцлагдаж, зарим нь оройн цагаар хойшлогдсон байна.

Цаг уурын албанаас тайлбарласнаар Номхон далайн хойд хэсгийн болон Түвдийн өндөрлөгийн даралт ихтэй бүсүүд Солонгосын хойгийн дээгүүр давхцаж, борооны улирлын хур бага байсан нь халууныг улам эрчимжүүлсэн байна. Уулсаар хүрээлэгдсэн хотхонд орших Янсан хотод дулаан хуримтлагдаж, агаарын эргэлт хязгаарлагдсан нь дээд амжилт тогтооход нөлөөлжээ.

Энэ долоо хоногт ч халуун үргэлжилж, өдрийн хэм 32-38 хэмд хүрэх бөгөөд шөнийн цагт ч сэрүүсэхгүй "халуун шөнө" тохиох төлөвтэй байна.

Эх сурвалж: The Korea Times,