АНУ-ын Сенат Оросын эсрэг өргөн хүрээний хориг арга хэмжээ авах хуулийн төслийг 86:12 саналаар дэмжлээ. Уг хууль батлагдвал Оросоос эрчим хүч худалдан авдаг Хятад, Энэтхэг зэрэг орнуудын бараанд 100 хүртэлх хувийн тариф ногдуулах боломжтой болох юм.
Хуулийн төслийг энэ сард гэнэт таалал төгссөн, Украйныг тууштай дэмжигч байсан сенатор Линдси Грэмийн нэрэмжит болгожээ. Санал хураалтын үеэр Грэмийн оршуулгын ёслолд оролцохоор Вашингтонд байсан Украйны Ерөнхийлөгч Володимир Зеленский Сенатын танхимаас ажиглаж, "Энэ бол энх тайван руу хийж буй алхам" хэмээн мэдэгдсэн байна.
Хуулийн төсөлд Оросын Ерөнхийлөгч Владимир Путин болон батлан хамгаалахын салбарын 20 гаруй өндөр албан тушаалтан, компанид шинэ хориг тавихаас гадна Оросын эрчим хүчийг хамгийн их худалдан авдаг таван оронд 100 хүртэлх хувийн, Оросоос АНУ руу шууд орж ирэх бараанд 500 хүртэлх хувийн тариф ногдуулах эрхийг ерөнхийлөгчид олгохоор тусгажээ. Хятад, Энэтхэг, Турк улсууд гол бай болж болзошгүй гэж шинжээчид үзэж байна.
Харин АНУ-ын Ерөнхийлөгч Дональд Трамп хуулийн төсөлд Ираныг мөн хамруулахыг шаардсан нь батлагдах хугацааг хойшлуулж болзошгүй юм. Төсөл одоо Төлөөлөгчдийн танхимд шилжих бөгөөд тус танхим зуны амралттай байгаа тул намар хэлэлцэх төлөвтэй байна.
Эх сурвалж: Al Jazeera
Сэтгэгдлүүд 0
Одоогоор сэтгэгдэл байхгүй. Анх сэтгэгдэл үлдээгч болоорой.
Сэтгэгдэл үлдээх
Ёс зүйн хүрээнд сэтгэгдлээ үлдээгээрэй.