1,742 иргэнийг залилж, ₮5.2 тэрбумын хохирол учруулсан этгээдүүдийг баривчилсан байна

Цагдаагийн ерөнхий газрын Кибер гэмт хэрэгтэй тэмцэх газраас залилах гэмт хэрэг үйлддэг 17 этгээдийг баривчилж, 1,742 иргэнд 5.2 тэрбум төгрөгийн хохирол учруулсан гэмт бүлэглэлийн үйл ажиллагааг илрүүлсэн байна.

Тодруулбал, гадаад улсын цахим залилах гэмт хэрэг үйлддэг үндэстэн дамнасан зохион байгуулалттай бүлэглэлд Монгол Улсын иргэд элсэж, тухайн бүлгийн аргачлал, заавраар фэйсбүүк орчинд хуурамч хаяг нээн "Хусдаг сугалаа", "Алт, үнэт эдлэлийн сугалаа", "Үнэт болон уурхайн чулуу"-ны азтан шалгаруулах шууд бичлэг ашиглан залилах гэмт хэргийг үйлддэг байжээ.

Этгээдүүд иргэдийн итгэлийг олох, хууль бус үйл ажиллагаагаа нуун далдлах зорилгоор Хаан банкны апликейшныг хуурамчаар зохиож, Сангийн яамны тусгай зөвшөөрөлтэй үйл ажиллагаа явуулж байгаа мэтээр зохиомол нөхцөл байдлыг бий болгон залилаж байв. Хохирлын мөнгөн дүнг шууд шилжүүлдэг байсан бөгөөд гэмт хэргийг Монгол Улсын хилийн гаднаас үйлдсэн болохыг тогтоосон.

Нийслэлийн Чингэлтэй дүүргийн прокурорын газрын хяналтад мөрдөн шалгах ажиллагааг явуулж, эрүүгийн хэрэг үүсгэн яллагдагчаар татаж, цагдан хорих, хязгаарлалт тогтоох таслан сэргийлэх арга хэмжээ авчээ.

Энэ төрлийн гэмт хэрэг 2025 оны долдугаар сараас бүртгэгдэж эхэлсэн бөгөөд урьдчилсан байдлаар 1,742 иргэнд 5.2 тэрбум төгрөгийн хохирол учруулсан нь тогтоогдсон.

Мөрдөн шалгах ажиллагааны явцад тухайн гэмт бүлэглэлд хамаарах Монгол Улсын 12 иргэн гадаад улсад байрлан дахин энэ төрлийн гэмт хэрэг үйлдэхээр бэлтгэж байгааг тогтоон, Интерполын "Улаан булант зар" мэдээгээр эрэн сурвалжлан албадан ирүүлэхээр холбогдох ажиллагааг Прокурорын байгууллагатай хамтран шуурхай хэрэгжүүлж байгаа аж.