Япон: Дайны дараах анхны нэгдсэн тагнуулын алба байгуулагдана

Ерөнхий сайд Санаэ Такаичигийн санаачилгаар Япон улс Дэлхийн II дайнаас хойш анх удаа нэгдсэн тагнуулын байгууллагатай болохоор бэлдэж байна. Хятад, Хойд Солонгос, Орос гурван чиглэлд анхаарал хандуулсан уг алба долдугаар сараас үйл ажиллагаагаа эхлүүлж магадгүй.

Японы Ерөнхий сайд Санаэ Такаичи Дэлхийн II дайнаас хойш улсын анхны нэгдсэн тагнуулын алба байгуулах хууль тогтоомжийг урагшлуулж байна. Одоогийн Засгийн газрын тагнуул, судалгааны алба (CIRO)-г бүтцийн хувьд шинэчилж, бусад яам, тагнуулын нэгжүүдээс тархай хуваагдмал ирж буй мэдээллийг нэг төв рүү цуглуулан задлан шинжлэх энэхүү шинэ байгууллагыг "Үндэсний тагнуулын алба" хэмээх ажиллах нэртэйгээр санаачилсан.

Такаичигийн засгийн газар уг хуулийн төслийг 3-р сард Засгийн газрын хуралдаанаар баталж, парламентад хүргүүлсэн. Дээд танхим эцсийн баталгаажуулалт өгсний дараа тус алба долдугаар сараас үйл ажиллагаагаа эхлүүлж болзошгүй гэж The Japan Times, Nikkei Asia мэдээлсэн. Эхний шатанд 700 орчим ажилтантай байх төлөвлөгөөтэй ч энэ тоо ойрын жилүүдэд эрчимтэй өсөх төлөвтэй.

АНУ-ын дэмжлэг

Шинэ бүтцийг АНУ-ын Холбооны мөрдөх товчоо (FBI) шууд дэмжиж байгаа. Өнгөрсөн долоо хоногт CIRO-ийн дарга Казуяа Хара Вашингтонд хүрэлцэн ирж, FBI-ийн захирал Каш Пателтай уулзан шинэ алба ямар бүтэц, чиг үүрэгтэй байхыг танилцуулжээ. Пател энэхүү байгууллага "хоёр улсын хамтын ажиллагааг ихээхэн бэхжүүлж, Японы яамдын дунд олон жил тархай байсан тагнуулын мэдээллийг төвлөрүүлнэ" хэмээн нийгмийн сүлжээгээр мэдэгдсэн. Мөн Вашингтон Токиод кибер аюулгүй байдал, эсрэг тагнуул, тагнуул, терроризмын эсрэг чиглэлд дэмжлэг үзүүлэхээ илэрхийлсэн байна.

Хятад, Хойд Солонгос, Орос гурав

Шинэ алба нь Хүйтэн дайны үеийн уламжлалт тагнуулын байгууллага биш бөгөөд стратегийн өрсөлдөгч орнуудын талаар гүн мэдлэгтэй шинжээчид, орчин үеийн өгөгдөл боловсруулах хиймэл оюуны мэргэжилтнүүдийг шинээр элсүүлэх зорилготой. Үүний зэрэгцээ Хятад, Хойд Солонгос, Орос зэрэг улсуудад ажиллаж байсан туршлагатай дипломат, тагнуулын ажилтнуудыг идэвхтэй хайж байгааг South China Morning Post тэмдэглэжээ.

Олон улсын хямралын бүлгийн (Crisis Group) Тайваньд төвтэй шинжээч Уильям Ян хэлэхдээ: "Такаичи энэ санаачилгаар юунд хүрэхийг тодорхой мэдэж байна. Энэ агентлаг байгуулагдаж буй нь Япон өнөөдөр ямар хэмжээний аюул, заналхийлэл мэдэрч буйг харуулж байна."

Шүүмжлэл ба эргэлзээ

Шинэчлэлийг бүгд эерэгээр хүлээж аваагүй юм. The Diplomat сэтгүүлийн дүн шинжилгээнд дурдсанаар хүний эрхийн байгууллагууд, тэр дундаа Human Rights Watch хэмээх олон улсын байгууллага шинэ албаны хяналт, ил тод байдал-ын асуудлыг хөндсөн. Японд тагнуулын үйл ажиллагаанд хууль зүйн тогтоосон зааглал харьцангуй сул байдаг тул шинэ агентлаг "иргэдийн хувийн нууцад нөлөөлж, цэрэгжсэн хяналтын төв болж хувирах эрсдэлтэй" хэмээн зарим шинжээч анхааруулжээ. Бусад нь үүний эсрэгээр CIRO-гийн одоогийн бүтэц олон арван жил тархай байж, дэлхийн стратегийн зураглал хурдацтай өөрчлөгдөж буй өнөөгийн нөхцөл байдалд тэнцэхгүй болсон нь ийм шинэчлэлийг хойшлуулшгүй болгож байна гэж үздэг.

Бүс нутгийн ач холбогдол

Хэрэв шинэ алба үйл ажиллагаагаа эхлүүлбэл Япон нь "Таван нүд" (Five Eyes) тагнуулын эвсэлд (АНУ, Их Британи, Канад, Австрали, Шинэ Зеланд) зургаа дахь түнш болох замдаа ойртох боломжтой гэж Geopolitical Monitor зэрэг шинжилгээний хэвлэлүүд таамаглаж байна. Энэ нь Зүүн Ази дахь хүчний тэнцвэрийг Бээжингийн эсрэгээр нөлөөлөх боломжтой томоохон геополитикийн өөрчлөлт болох юм.

Эх сурвалж: South China Morning Post, The Japan Times, Nikkei Asia, The Diplomat, Geopolitical Monitor