Трамп Ираны эсрэг хориг хэдэн сараар үргэлжилж магадгүй хэмээн анхаарууллаа

АНУ-ын Ерөнхийлөгч Дональд Трамп Ираны эсрэг АНУ-ын тэнгисийн цэргийн хориг хэдэн сараар үргэлжилж болзошгүй гэж мэдэгдсэн нь газрын тосны үнийг сүүлийн дөрвөн жил гаруйн дээд түвшинд хүргэж, пүрэв гараг хүртэл өндөр хэвээр хадгалахад нөлөөлжээ.

Иран, АНУ-ын хоорондын дипломат яриа хэлэлцээ бүтэлгүй оролдлогуудын дараа гацсан хэвээр байгаа билээ. Тэгвэл Трамп лхагва гарагт ОХУ-ын Ерөнхийлөгч Владимир Путинтэй утсаар ярьсан байна. Путин АНУ болон Израил Ираны эсрэг дайнаа дахин эхлүүлбэл “ноцтой сөрөг үр дагавар” гарна гэж анхааруулжээ.

Газрын тосны салбарын удирдлагуудтай уулзах үеэрээ Трамп Ираны боомтуудыг бүслэх нь бөмбөгдөхөөс илүү үр дүнтэй гэж үзэж байгаагаа илэрхийлсэн байна. АНУ-ын Төв командлал лхагва гарагт X платформд нийтэлсэн мэдэгдэлдээ “хоригийг зөрчихөөр оролдсон 42 дахь худалдааны хөлгийг амжилттай чиглэл өөрчлүүлснээр чухал амжилтад хүрсэн” гэжээ.

Трамп уг дайныг зогсоох хүчтэй улс төрийн дарамтад орж байгаа бөгөөд дайныг үргэлжлүүлж буй нь түүний дэмжигчдийн дунд ч төдийлөн таалагдахгүй байгаа юм. Мөн дайны улмаас шатахууны үнэ өсөж, америк хэрэглэгчдийн зардал нэмэгдсэнээс гадна АНУ-ын холбоотнуудыг түгшээж байна.

Мягмар гарагт болсон уулзалтын үеэр Трамп “дэлхийн газрын тосны зах зээлийг тогтворжуулах, шаардлагатай тохиолдолд одоогийн хоригийг хэдэн сараар үргэлжлүүлэх, ингэхдээ америк хэрэглэгчдэд үзүүлэх нөлөөг багасгах арга хэмжээ”-ний талаар хэлэлцсэн гэж Цагаан ордны нэгэн албан тушаалтан мэдэгджээ.

Газрын тосны үнэ огцом өсөж, зургадугаар сард нийлүүлэх Брент төрлийн нефтийн үнэ 5 гаруй хувиар өсч 124.81 ам.долларт хүрсэн бол Вест Техасын дунд зэргийн нефть (WTI) ойролцоогоор 2 хувиар өсч 109 ам.доллар давжээ.

Лхагва гарагт Трамп Германы канцлер Фридрих Мерцийг шүүмжилж, Герман улс Ираны дайныг дэмжихээс татгалзсан, мөн Ормузын хоолойд энхийг сахиулах хүчинд хувь нэмэр оруулаагүй тохиолдолд АНУ Германд байрлах цэргийн тоогоо бууруулж магадгүй гэж сүрдүүлжээ.

Мерц энэ долоо хоногийн эхээр Иран хэлэлцээний ширээний ард Вашингтоныг доромжилж байна гэж мэдэгдсэнээс хойш Трампын шүүмжлэлийн бай болжээ.