УИХ-ын чуулганы нэгдсэн хуралдааны үеэр УИХ-ын гишүүн Д.Цогтбаатар одоогийн ажиллаж байгаа УОК болон Засгийн газрын гишүүдэд хандан үг хэлсэн юм. Тэрээр Монгол Улсад халдварыг бүрэн хумьж, тэг болгох боломж байгаа, тэрний төлөө зоригтой ажилламаар байна гэлээ.

-УИХ-ын гишүүн Д.Цогтбаатар: Би УОК-ын гишүүн байсны хувьд хэдэн зүйл хэлмээр байна. Хүмүүс эдийн засаг хэцүүдлээ гээд яриад байгаа. Энэ бол буруу биш. Гэхдээ Монгол Улсын онцлог нөхцөл байдлыг анхаарах хэрэгтэй. Манай улс дотроо халдвар алдчихаад 20-иод хонож байхад халдварыг огцом алдчихгүй, өдөрт илэрч байгаа халдварын тоо 20 орчим байна. Өнөөдөр 7  болж буурсан байна. Цаашдаа нэмж, хасагдаад явах байх. Хамгийн гол нь манай улс халдварыг тэсрээд алдчихаагүй байна. Бусад орнууд халдварыг дотроо алдаад хэдэн мянгаараа тоологдоод явж байна. Харин манай улс дотооддоо тархсан халдвараа барьчихаад доошоо тэг руу оруулахаар тэмүүлээд ажиллаж байна. Ийм боломж, нөхцөл байхад сонголтыг хэрхэн хийх вэ гэвэл бусад орнуудыг дуурайж эдийн засгаа чөлөөлөх биш, харин тэг рүүгээ тэмүүлэх сонголтыг л хийх ёстой. Халдварын тоо тэг болж, хумьж чадвал бид эдийн засгаа илүү анхаарах боломжтой болно. Манай улс дотооддоо халдварыг тархаагаагүй байхдаа эдийн засаг хэвийн явж байсан. Зөөвөрлөгдсөн халдвартай байхад халдваргүй юм шиг явж байна. Тэгэхээр бид тэг рүүгээ тэмүүлж чадаж байж л эдийн засгаас чөлөөөлөх боломжтой болно.Өвчин зовлон, халдварын тархалт өндөр байгаа хэрнээ эдийн засгаа чөлөөлөөд байгаа орнууд бол халдварын тоогоо алдчихсан, тэг рүү тэмүүлэх ямар ч боломжгүй болчихсон. Тэг рүү тэмүүлэх гээд хамаг юмаа хаасан ч тэг дээр ч очихгүй, хажууд нь эдийн засаг нь хамт унана. Өөрөөр хэлбэл, эдийн засагчгүй, эрүүл мэнд ч үгүй болох гээд байгаа учраас зарим улс эдийн засгаа тодорхой төвшинд чөлөөлж байгаа юм. Халдвараа нэмчихгүйхэн шиг хязгаарлалтын хүрээнд үйл ажиллагааг явуулах боломжийг бүрдүүлж байна. 

Тиймээс одоо УОК маш зоригтой ажиллаж, урдаа тавьсан зорилтуудаа биелүүлээд яв. Одоо хэн нэгэн шүүмжилчихнэ гэж айгаад, арагшаа ухраад суугаад байх хэрэггүй. Угаасаа ч шүүмжлүүлэхгүй байх боломж байхгүй. Дотроо нэг ч халдвар байж л зөндөө шүүмжлүүлж байсан. Дотооддоо алдсан юм чинь мэдээж их шүүмжлүүлнэ. Гэхдээ үр дүн гарах, халдварыг намжааж, тэг болгох боломж байна.

Сангийн сайдад хандаж хэлэхэд, энэ цаг үед нийгмийн халамж, эдийн засгийг дэмжих чиглэлд мөнгө харамлаад хэрэггүй. Яаж ийж байгаад жижиг бизнесүүдээ дэмжиж, татвараа хөнгөлж, түрээс төлбөрийг бууруулж, банкуудтайгаа ярьж байгаад зээлийн хүүгээ бууруулах байдлаар өнөөдрийн эрсдэлийн өмнө бүх нөөцөө тавьж ард нь харах хэрэгтэй. Үүний ард гарч, эрүүл хүн амтай байхад эдийн засаг чинь аяндаа өснө шүү. Өнөөдөр эрүүл мэнд бол эдийн засаг юм" гэлээ.